電熱水爐選購竅門

就冬天，屋企部熱水爐神神地，想換番部新機。早幾日消委會咪測試左12款儲水式電熱水爐，安全性全部達標。不過，熱水爐又分無排氣管式、花灑式兩種，小妹就係唔知邊一種先自己。即刻搵消委會老友教路 。


老友話如果需要接駁至多個出水位，好似浴缸同洗手盆等，應選擇無排氣管式電熱水爐。如果只係需要接駁一個花灑使用，宜選擇花灑式電熱水爐。至於考慮儲水箱容量方面，因為每個人用水同沖涼習慣都唔同，選擇時可以參考過往的使用經驗，如發現之前熱水經常太早用完，就要選擇較大的型號，但一定確保有足夠空間可以安裝。無排氣管式電熱水爐以25升之容量較普遍，而花灑式通常為18至20升。


快速加熱 價錢較貴


老友又話，同一牌子同容量的電熱水爐，購買時通常都有唔同的額定功率以供選擇，額定功率越高，加熱速度越快，即係所需要的預熱時間越短，不過，價錢會較貴。另外，購買無排氣管式電熱水爐時，通常可以選擇將溫度及壓力減卸閥設在爐的左邊或右邊，而減卸閥一定要裝設一條向下伸延的排水管，將排水引至一個可以看到而安全的去水口。用家要視乎實際安裝環境，選擇將減卸閥設在左邊或右邊。


資料來源 : 蘋果日報 - 19/10/08